Kalurahan Giritirto

Giritirto (SIDA SAMEKTA) Selasa 17 Maret 2020 Covid-19 sing wis sumebar ing Indonesia gelem ora gelem akeh aktifitas kudu diundur sawetara, utawa dibatalake. Saka aktifitas olahraga nganti pendidikan, kabeh disuda.

Sakliyane kuwi, wis akeh universitas sing miwit nganakake perkuliahan via wartel (SLJJ). Maksude sarana online. Ana sing suwene nganti saksemester, ana sing mung rong minggu. Daerah sing wis netepake Lockdown sing paling dhisik Daerah Jakarta, uga ing Solo awit ana wong mati ing RS. Muwardi sing jebul positip Covid-19.

Pamarentah Indonesia sing dhisike kumalungkung menawa Indonesia bebas Corona, saiki mung bisa nglentruk, kaya kethek ditulup.

Telat olehe cepak-cepak. Kepara cepak-cepake ndadak ngenteni ana korban mati dhisik. Malah sing digagas mung investasi, investor, ekonomi, lan pariwisata!

Sega wis dadi bubur. Covid-19 wis kadhung sumebar. Pamarentah Indonesia tundhone nggawe aturan prei kanggo akeh instansi sing suwene udakara rong minggu. Kareben masyarakat ngelongi kontak fisik kanthi meneng ana njero omah. Nek ora ana kabutuhan sing wigati banget, dipenging aja nganti metu ngomah.

Cilakane, Kebijakan lockdown iki dimaknai minangka wektu 'liburan' dening wong Indonesia. Kae bisa disawang wong Jakarta sing malah kemruyuk dolan Bogor. Padahal Bogor dadi pusat sebarane Covid-19.

Saumpama gelem sareh, gelem sabar. Anane Covid-19 lan anane kebijakan lockdown kuwi ngemu makna nek manungsa dikon ngunjal ambegan.

Leren saka oyak-oyakan kalawan urip sing ngoyak raja brana nganti lali wayah nyepi, manepi, nyedhaki marang Gusti.

Isine sirah sedina-dina mung pakaryan lan kekarepan. Urip sedina-dina sing marai manungsa prasasat robot.

Lockdown wayahe nenepi, tanapi siyang ratri. Ngelingi, duwe dosa apa manungsa mungguhe Gusti...